ڕاگری پەیمانگەی تەکنیکی گەشە بەشداری لە دیدارى دەسپاکى توێژینەوەى ئەکادیمی کرد بەڕێز د.ئەڤین فتاح حاجی مام ڕاگری پەیمانگەی تەکنیکی گەشە لە هۆڵى سەنتەرى ڕۆشنبیرى و کۆمەڵایەتى زانکۆى سەڵاحەددین، بەشداریکرد لە دیداری دەسپاکی توێژینەوەی ئەکادیمیکە بەئامادەبونى ژمارەیەک لە وەزیرەکانى حکومەتى هەرێمى کوردستان و سەرۆک زانکۆکان و ڕاوێژکاران و بەڕێوەبەرە گشتی و، نوێنەرى ڕێکخراوى (UNDP) لە عێراق و، ژمارەیەکى زۆر لە مامۆستایان با شێوەی هاوبەشى نێوان دەستەى دەسپاکى هەرێمى کوردستان و وەزارەتى خوێندنى باڵا و توێژینەوەى زانستى بەڕێوەچو. سەبارەت بەگرنگى دیدارەکە، د. عبدالفتاح عبدالرزاق بریکارى وەزارەتى خوێندنى باڵا و توێژینەوەى زانستى، ڕاگەیاند: گرنگى بەستنى ئەم دیدارە هاوبەشە خۆى لە مەترسى و ترسناکییەکانى لادان لە دەسپاکى ئەنجامدانى توێژینەوەى زانستى دەبینێتەوە، چونکە کاریگەرى زۆر خراپى لەسەر متمانەکردن دەبێت و، دەبێتە هۆى نەمانى متمانە بەتوێژەر و توێژینەوەکانیان، ئەوەش لەبەهاو ڕەسەنایەتى کە دەکاتەوە و، پێشێلکاریشە بۆ خاوەنداریەتى هزرى و مافى توێژەران، لەهەمانکاتدا بەهەدەردانى کات وماڵى گشتیشە، ئاماژەى بەخاڵێکى دیکەى گرنگى دیدارەکە کرد و وتى: لادان لە دەسپاکى توێژینەوەى ئەکادیمی پێشێلکارییەکى ترسناکى بنەماکان و بەها وڕەفتارى ئەکادیمیە، کە پێویستە هەڵوەستەى گەورەى لەبارەوە بکرێ و بەئاسانى سازشى لێ نەکرێ، هەربۆیە کارکردن بۆ داڕشتنى ڕەشنوسێک بۆ بنەماکانى ڕەفتار و ڕەوشتى ئەکادیمى بۆ مامۆستا و قوتابیان و خوێندکاران یەکێکە لە کارە گرنگەکانى داهاتومان، کە ڕەشنوسى سەرەتاى ئامادەکراوە. هەر لە مەراسیمى کردنەوەى دیدارەکەدا، لەلایەن د.ئەحمەد ئەنوەر سەرۆکى دەستەى دەسپاکى هەرێمى کوردستان و، نوێنەرى ڕێکخراوى (UNDP) لە عێراق بەجیا وتەیان پێشکەشکرد، لە وتەکانیاندا بەگرنگیەوە باسیان لە گرنگى دەسپاکى توێژینەوەى ئەکادیمى دەکرد بۆ پەرەپێدانى کۆمەڵگە و فراوانکردنى ئاسۆى مەعریفە بۆ خودى توێژەر و ناوەندە ئەکادیمیەکان و هاوڵاتیان بەگشتى، هەروەک هیواشیان خواست دیدارەکە بەڕاسپاردەى گرنگ کۆتایی بەکارەکانى بهێنێ. دیدارە هاوبەشەکەى نێوان دەستەى دەسپاکى هەرێمى کوردستان و، وەزارەتى خوێندنى باڵا و توێژینەوەى زانستى، کەبەهاوکارى ڕێکخراوى (UNDP) لە ئێراق بەڕێوەچو، بەگەڵاڵەکردنى کۆمەڵێک ڕاسپاردەى گرنگ و چەسپاندنى کۆتایی بەکارەکانى هات.
